عاتبتني لين شبت في شراييني لهبها

إستفزتني وفزت وزعلت مني عليه

واستضاقت من كلامي يوم زعلني عتبها

من بعدها ما بقالي في محانيها بقية

أسدلت دمع المحاجر للبكا وأرخت هدبها

والله إني مانويت أبدي معاها بالخطية

بس هي اللي تعدت حدها لحظة غضبها

يمكن أني كنت قاسي بالعتب معها شوية

كثر ما كانت تتمنى راحتي وأعشق تعبها

والله إني كنت أكابر بالعتب في حسن نيه

بس أبدري هو صحيح اني الوحيد اللي عجبها

جرحتني بالكلام وكبرت حيل القضية

واخسرت بي كل عرق من شراييني كسبها

ولا هي ما كان فيها للموادع مقدرية

والجفا كانت تعافه بس مدري وش قلبها

ليتني مارحت أقايس قيمتي عند بدوية

رجعت لي كل عرق حبها ولا نهبها

وعلمتني كيف بنجح وأنتصر وأبقى ضحية

وعلمتني كيف قلبي لو غلبها ما غلبها

وعلمتني يوم صدت عنفوان الأجودية

ما تلوح للمقفي لو سلبها ماسلبها

راضية بين القبايل والعرب وأهل الحمية

عاقلة ماتبذل إلا نخلة تعرف رطبها

إن تهادت ذكرتني في خفوق العامرية

وإن تمادت تركب إبليس الرجيم وما ركبها

جفنها لا سلهمت به ما يطيق السامرية

تسحبه براه عينه وإن سهت عينه سحبها

وإن حكت تعطي مكانه للحروف الأبجدية

كن كلمتها تلفت للكلام اللي عقبها

والحروف اليا تعدت بالشفاه النرجسيه

كنها صارت قصيدة بس ربي ما كتبها

وش بوصف من حلاها وش بخلي للبرية

مابها بالحسن عيب واكشفت إلا حجبها

شعرها فيه الخوي اللي تبرى من خويه

والشفا لو تشرب الما واختلط فيها شربها

كن في ظلمة شفاها جمرتين بنار حية

كل من حس بدفاها واحترق صد وقربها

شفتها مثل الجريمة وابتليت بها بلية

غلطة جيت أتحاشى ظلمها قمت أرتكبها

كل شي شفت فيها فيه نظرة جاذبية

موهبة من فضل ربي وأشهد أن الله وهبها

كلها لله بلله فاتنة هالأدمية

عاجبتني من بداية راسها لأسفل كعبها

لو تبادلني شعوري والهدية بالهدية

ما وفتني لو تبيع ثيابها وأغلى ذهبها

هملتني والقلوب الجرهدية جرهدية

وأحرمتني والمحبة نارها تاكل حطبها

ولا أنا ماكنت أكابر والليالي سرمدية

يمكن أن اللي غصبني للولع فيها غصبها

ياخفوقي ودي أنك منت في حاجة وصية

شف مكاني وأنت تدري وين هيمة عربها

رح لها وإن كان فيها قلب يطمع في مجية

شف طلبها في عروقه وإن حصل تمم طلبها

وإنشده وإن قال من هدر دمي برية

قله إن اللي حصل في المحبة من سببها

ومن يقول إني تعمدت الزعل لأجل الأذية

قله إني ماتحملت في العتب قلة أدبها

ومن يقول إني أنا اللي كنت بادي بالخطية

قل هي اللي تعدت حدها لحظة غضبها