ياراكب اللي طيبته من عماقه = ناب الفقار اللي بعادً مماسيه
حر" خطاه طوال من طول ساقه = يمش النهار وداجي الليل يسريه
قطم" فخوذه جل ماهي دقاقه = يوم اصفه سبحان رب" مسويه
ماله عن الدرب العدال أصطفاقه = رفض" عجل ماله حلي" يحاليه
يقطع عجاريم التراب ورقاقه = هميم.. نوش المطرقه مايدانيه
ماهو ترايستار صنعة حماقه = سواقها مايلتفت لو تناديه
ياراكبه خلك عليه برفاقه = انته دليله واقطره لاتصفويه
ممشاك عشر وجاب والهن لحاقه = يومين والا يوم بحساب محريه
قد جيت ديرة حافضين التفاقه = يوم" كل" له دويم يصاليه
وان جودو خضر النمش بأنصلاقه = يفرقون الجمع لو بارقه فيه
تشبع على اثرهم اسباع الصناقه = فعل" نعده للقبايل ونرويه
وعسى الخيال اللي صدوق" حقاقه = تبرق ماقاديمه وتبرق مثانيه
بأمر الله اللي من مناشيه ساقه = ان صب ماه وبارقه ينعزى فيه
يفداه من ساقه على حسن ساقه = يسقي ديٌرهم والربيع امتقفيه
هذا وراس العلم ياخذ سياقه = ونديبي الطراش ماني بناسيه
وليا وصلت اشبح نظرك بلباقه = حتى تشوف البيت وتشوف راعيه
وعده لقرم" يحتمي كل ساقه = حر" على ساسه جويده مجانيه
عشَاق هامات المراجل عشاقه = طيبه على جده وطيبه على ابيه
تلقاه للافي يزيد أشتياقه = ماينصفق بالك ليا صرت لافيه
تلفي سعد مكمل حقوق الرفاقه = وانته نديبي تبخصه مأنت غاويه
صديقي الباخص ونعم الصداقه = رفيقي الطيب واعزه ومغليه
سلم عليه وبأجود الجود راقه = تلقاه شغموم" حميده مساعيه
وليا اجرهد الهرج سير بنطاقه = ثم أنشده عن خاله الله يجازيه
قول العهد به والشهر مع غلاقه = يشعب حصانه والضعينه تباريه
يشعى البعير اللي عليه الوساقه = سرساح مع جيش الشرارات ناقيه
متنحر" جو" بعيد" طراقه = نعم بصالح كل ماحل طاريه
وليا نشد عني بنشدة وثاقه = عطه الكتاب ولاتفسر معانيه
وقله ترى صاحبك هذا مساقه = يبا يجي مانايد البعد حاديه
ويقول ابا اترك للعراقي عراقه = كله يدج وكل سيل" بواديه
ومن لاعاطاه الوقت كف الحلاقه = لابد ماعجلات الايام تعطيه

للهرج ميزان ان تعدى نطاقه = تزيد سياته وتنقص حسانيه
والناس فيها للعلوم اندلاقه = وكل" على كيفه تفسر هقاويه
وان صار جرح" فـ السلوك الدقاقه = يصعب على دكتوره اللي يداويه
ياراكب اللي صنعها به ذواقه = اسلوب فن وعقل عالم يقديه
والكمبيوتر مايلفق لفاقه = مافيه مسمار" على غير توجيه
لولا كذا ماصار فيها فواقه = يسعى لها من كل فج وتواجيه
استلث مايبغى لها من سواقه = تمشي على احدث علم ياجاهل" فيه
اليا نوٌت جو الفضا بنطلاقه = ترهج صليب القاع وتهز اراضيه
ممشاك عشر اوجاب من فوق ناقه = لها دقيقه يامعني بناخيه
تاصلك قبل البن يصبح حراقه = لاباس واللي جاب علم" يوديه
يالشاعر اللي صار فيه انطراقه = ومن ما بصدره مايحقق مراميه
انا ادري انه للسان انزلاقه = لاكن منطوقه وش اسباب داعيه
قدام يصبح للجيوب انتفاقه = واللي يقول القول يحمى قوافيه
من لايميَز بالنظر في حقاقه = سوات من بيديه يهدم مبانيه
ترى المثايل عند اهلها شفاقه = هذا الخبر مني واذانيك توحيه
مافيه للأثنين داعي علاقه = حتى تعلم ذا والاخر توصيه
تبى تشرف من يشرف رفاقه = اونس لهيب الجمر ياللي تصاليه
نوم الضحى للعين فيه انسراقه = قطاع راجي مرجله من مراجيه
واليا صحى اللي نام عقب انشراقه = ياقف على رجليه ويقلب اياديه
وصقر النصافي قال لن جاك عاقه = من الرفاقه ياجب انك تداريه
داره يالين الله يتمم فراقه = بالخير.. والا الشر محد" بباغيه
ماجاك من دورالزمان انزناقه = حتى تخم الدرب الأبيض وتخطيه
مير المنافق لاتسمَع نفاقه = يبغاك تنقل حمل مأنته بقاويه
واللي يغني بالمثل من زهاقه = يصبر على ماقد يجي من بلاويه
اليا غدى لسهوم اهلها انزراقه = ثم اختلط مفهوم مره وحاليه
موج" على اللي فيه صار انصفاقه = مالي طلب واقرب حدود الخطر ليه