منتدى بني عزيز الرسمي من مطير - يااماضي الوقت لوتدري عن اليوم

ياماضي الوقت لو تدري عن اليـوم شقيـت ثوبـك وذبيـت الخريمـه

شقيت ثوبك قهر وهمومـك همـوم وشديت والناس من حولـك مقيمـه

شديت منجوم وانته منـت منجـوم وركايبك صـدرت وهيـه محيمـه

سبايب القـوم واللـي تفعـل القـوم وقع الفعايل على االحسـاس اليمـه

صار الخوي مايطوف شـي ويلـوم يزعل وينسى الصداقـه والحشيمـه

من الحبـه يسـوي القبـه وياقـوم كنه من القـوم كاسـب لـه غنيمـه

ويقول مظلوم لو ماهـوب مظلـوم ترك العوايد هـو اسـاس الظليمـه

صارت تباع العوايد بـاول السـوم جريـمـة ماتظاهيـهـا جريـمـه

لاكـن ياوقـت مالومـك ومقسـوم النـاس تاخـذ مـن الدنيـا قسيمـه

منول الصاحـب مقـدر ومحشـوم والآن غلطـه نتايجـهـا وخيـمـه

ومنول العشره مع الصاحـب تـدوم والنـاس كانـت نواياهـا سليـمـه

واليوم في كوم عنك وصرت في كوم ماعاد يحسـب لهـا قـدرن وقيمـه

يالله دخيلـك ماعـاد العالـم تشـوم والمنهـزم مايفـكـر فالهزيـمـه

دنيا تغديـك ثومـن والعشـاء ثـوم ودروبهـا ماتجيـلـك مستقيـمـه

يطيح مع دربهـا المسكيـن ويقـوم وهيه تقـول الـه يامـال الحريمـه

لو تصفي اليوم ماتصفـي لنـا دوم مقيولتـن فالـروايـات القديـمـه

والناس حسب المصالح تكثر الحـوم وتشوفهـا دايمـن حـول الوليمـه

اسمع من الناس بيتن قيـل وعلـوم قاله حكيمن مـن النـاس الحكيمـه

صلى المصلي لامر وكثـر الصـوم ولما انتهى الامر وش سوى البهيمه

كب الصلاه وماصام وردهـا نـوم والناس كلـن يقـول امـه عقيمـه