منتدى بني عزيز الرسمي  من مطير

منتدى بني عزيز الرسمي من مطير (http://www.azizenet.net/vb/index.php)
-   بحور الشعر الخاص (يمنع المنقول) (http://www.azizenet.net/vb/forumdisplay.php?f=89)
-   -   مساجله بيني وبين الشاعر مشعل معيض (http://www.azizenet.net/vb/showthread.php?t=17154)

رويضي وسمي العزيزي 12-08-2012 07:50 PM

مساجله بيني وبين الشاعر مشعل معيض
 
السلام عليكم ورحمة الله وبركاته

هذه مساجله بيني وبين الشاعر مشعل بن معيض العزيزي

هذه قصيدتي

الا يامل قلبٍ فيه من سود الليالي غيض
توارد له على الهجعه همومٍ تطرق ابوابه

مثل ماتارد العد الضوامي في لهيب القيض
ليا هل السويبع واحتمى شوبه وملهابه

غدة حلكٍ لياله سود من عقب الليال البيض
بعد ريفه غدا كن الدبا الحنان يرعابه

يتلنه هجوسه تلة المجذوب يابن معيض
كما مجذوب عدٍ بين شطانه وجذابه

على جذبه من العد العسيف مروضٍ ترويض
يغنى له على صوت المحاله كل ماقفابه

من العد الرهي يجذب على المغراب لين يفيض
وروده تدحم ماينقص المغراب شرابه

همومٍ نقضت فيه الجروح المرمسه تنقيض
تجدد كل جرحِ فالفؤاد وتنبش اسبابه

جروحٍ مايداويها علاج الطب والتمريض
سبايبها الزمان اللي عليه دار دولابه

ابيه يعوضني لكن اخذ مني بلا تعويض
لين ايست وقنعت انه مايعطي الحق طلابه

ولاليه جدا الا احرض هجوس الشعر تحريض
ابسمع منك طاروقٍ عن الهم اتسلابه

عساهـ يخفف همومي وهجسك بالجديد يهيض
جديدٍ ننتظر منه المجي وطول غيابه



وهذا رد الشاعر مشعل معيض العزيزي

هلا باللي يسخر ذايرات الشرد لين تريض
تقول انه يسخرها بعصاه وضرب مشعابه

يحول ويتخير فالسمان ويترك النفيض
ولاكل الذي ترضى به الشعار يرضابه

فرايد من ذهب واسعارها ماتقبل التخفيض
يميزها الفطين وشاعر المعنى وكتابه

ليا جتني بيوته حرك شجوني على النقيض
وانا قلبي مولع بالجزيل ومن تغنابه

زمانك يابن وسمي صورته ماتقبل التحميض
تناهشنا حصانيته ولنا تنبح كلابه

غدينا فيه لعبه للهموم وضحكة البغيض
وصرنا مانميز كل شي فيه متشابه

رمينا بالسهم ونقول عند الحض ياحضيض
ورحنا ماجمعنا شي من خوخه وعنابه

درسنا لين ملينا من التكرار والتحفيض
رسبنا والغبي ينجح لوانه يعكس الجابه

منيع الله داخل 12-08-2012 08:50 PM

شاعرنا الكبير رويضي. راعي الجزله. وصح لسانك على هذا القاف الذي هاضنا لمافيه من لذه في طرح الموضوع والتسلسل المتناسق. وجودة المفرده الرائعه. كما أشكر الشاعر مشعل على الرد الممتع في أختيار الرد على كل بيت. لقد وفقتوا جميعكم. وشكرآ. تقبلواا تحياتي

الليث 12-08-2012 10:26 PM

فرايد من ذهب ترسل من رويضي على ابن معيض
قــريت البـاذخـــه واللــيـــث قام وســجــل اعــجابه
صح لسانك يارويضي
وصح لسان مشعل ابن معيض
عزالله ابدعتو ولافيكم حيله
وتقبلو تحياتي

رويضي وسمي العزيزي 12-11-2012 01:05 PM

اقتباس:

المشاركة الأصلية كتبت بواسطة منيع الله داخل (المشاركة 194019)
شاعرنا الكبير رويضي. راعي الجزله. وصح لسانك على هذا القاف الذي هاضنا لمافيه من لذه في طرح الموضوع والتسلسل المتناسق. وجودة المفرده الرائعه. كما أشكر الشاعر مشعل على الرد الممتع في أختيار الرد على كل بيت. لقد وفقتوا جميعكم. وشكرآ. تقبلواا تحياتي



اشكرك اخوي ابو عادل واسعدني مرورك وشهاده اعتز بها

رويضي وسمي العزيزي 12-11-2012 01:10 PM

اقتباس:

المشاركة الأصلية كتبت بواسطة الليث (المشاركة 194020)
فرايد من ذهب ترسل من رويضي على ابن معيض
قــريت البـاذخـــه واللــيـــث قام وســجــل اعــجابه
صح لسانك يارويضي
وصح لسان مشعل ابن معيض
عزالله ابدعتو ولافيكم حيله
وتقبلو تحياتي


ارحب الليث وعذرني على التاخير على الرد ويسعدني ماينال اعجابك واعتبره وساماً لي حفضك الله


الساعة الآن 02:05 AM.

Powered by vBulletin® Version 3.8.4
Copyright ©2000 - 2025, Jelsoft Enterprises Ltd

 

"جميع المشاركات المكتوبة تعبّر عن وجهة نظر صاحبها ... ولا تعبّر بأي شكل من الأشكال عن وجهة نظر المنتدى "

vEhdaa 1.1 by NLP ©2009