منتدى بني عزيز الرسمي من مطير

العولمه:

قصيده للشاعر مرزوق ابن جامل العزيزي موجهه للشاعر عايض ابن نور العزيزي واليكم القصيده وردها :

سلام ياعائض عسى الاش يفداك
يامعدل المـــيزان لاصـــــــــارمايل
تحية اﻻسلام والشــــعرينــــصاك
يردم ســحابه مثل ردم المـــخايل
لاحت بروقه ويتزاحـــم لطــــرياك
وعقب اليباس اصبح خضاره بدايل
مامقصدي طاروق ويــــاك ويــــاك
ولامقصدي شهره بشتى الوسايل
لكن فكر وافــهم العــــلم لاجــــاك
اعطيك رمـــز وفالرمـــوز الدلايـــل
يالعولمه لاعـــاد علـــم عرفنــــاك
اثر عــــلينا بالنــــظر والرســــايل
ادخل علينا الشر مع كل شبــــاك
وساوى الرجال بناقضات الجدايل
ويبث بالارســـال منــــا ومنـــــاك
وحط الاواخر في محل الاوايــــل
وعاداتنا فيـــه كثـــــير التفكـــاك
ولانعرف الصادق من اللي يحايل
يلعب بها الجاهل وزاد التشــرباك
وراحت رجال العرف واهل الصمايل
وحنا على الموضه ركضــنا للادراك
ونقول فالعلم السنع شي هــايل
وصرنا نقارن بين صنــعاء والاتراك
وبين القطيف وبين لندن وحـــايل
ناخذ شوي شـــوي منـــا ومنــاك
وصرنا سوات اللي غداء بالقوايل
ويالله في لطفك وطاعتك ورضاك
ورحمتك يامعبــود يوم الهــــوايل

واليكم رد الشاعر : عايض نور العزيزي

يامرحــــبا عــداد دورات الافــــلاك
ياشــاعر بشــعره يمــــثل قبـــايل
ترحيب في شعرك ومثلك وشرواك
ياراعي الوقفه وراعــي الجمـــايل
خطك وصلني مــير حيــاك حيـــاك
خطً مـــوضح ياحمـــيد الخصــــايل
تشكي لي من العولمه لاعدمناك
وتقول فــيه ان النشـــاما قــــلايل
وشرهان من هذا وشرهان من ذاك
وكنك على اهل العلم بلحيل شايل
لكــــن ركز زيـــن ونـــــظر بعيــــناك
وتشوف تالي الوقت كيف انت قايل
هذا التـــطور ياعسى الله يرعــــاك
علم وحضــــاره مايبي له مســــائل
تقضي لزومك وانت جالس بمركاك
على جــــهاز الـــنت ولا المــــوبايل
علمً خدمنا عــــبر تشبيك الاسلاك
كلً يابو تركــي من الخــــير نــــايل
الناس وصلت للقمر ونت وش جاك
تبغى زمـــانً فيه قــــدح الفتــــايل
وقتً ماتامن فيه من كثـــرت اعداك
كل يقــــول انه مســـوي فعـــــايل
اما تعـــــش الذيــــب ولاتعشــــاك
ولاتحـــــزم ثم شــــــيل الثقـــــايل
ورزقك على عالم مماتك ومحياك
وكل شــــي غير الله به الكون زايــل