مبروك يامحمد شـراك المجاهيـم=جرد الرقاب اللـي سـواة النعايـم
حرش الجنوب امشرهفات مراديـم=سمح الوجيـه مسلهبـات جسايـم
سود(ن)على البيدا طرفهن كما الغيم=عزل العقيـد اللـي تقلـد عمايـم
الـي شعوهـن مبعديـن المهازيـم=واستثمنـن مابيـن بايـع وسـايـم
وبانت فعول اللـي لهنـه مغاريـم=وخلـي ثمنهـن للطيـور الحوايـم
البل لها حق على كـل صمصيـم=شرواك يوم انك عن الـدون شايـم
طير الفلاح اللي كفوفـه ملاحيـم=الى هد صيده مـن كبـار الغنايـم
باكر الى بكر من الوسـم توسيـم=ودلو الثريـا طـاح منهـا هدايـم
وجاب فصيل الهرش حس الروازيم=وشفت اول ابكار المشاتـي تسايـم
وعن الموارد زاملن جازي الريـم=وراحت على طرد الوسامي قسايـم
هـاذي تحطـم للمقاهيـر وتهيـم=وهاذي تنـاوي للجنـب بالهزايـم
وهاذي ملاقيـة تخفـق الخواريـم=وهاذي معشر راسهـا راس عايـم
وجاتك من الرعيـان رد المعاليـم=قالواترى الصمـان بالنبـت قايـم
ترعا طنف نبت الفيـاض المكاليـم=وعلى الفياح مـن الشقـارا لمايـم
وزانت مظاهيرك لهاك السلاجيـم=اللي لهـن حـول المقـوم رزايـم
وعزمت لك ربع(ن) لشوفك مظاريم=وزمت لكم هاك العصـور القدايـم
وجذعانهـن اللـي للأنثـا مداريـم=راحـن عقايـر للمسيـر ولايــم
وراع الرصيد اللي يحفظ الملاليـم=لاشافهـا كثـرة عليـه الهظـايـم
البل رصيد اللـي عليهـا قواديـم=والا الضعيـف لمثلهـا مـا يلايـم