تدري وش اصعب من حياة المضره= حياة عاشق ينتظر لمس اياديك
من كثر ماهو في جحيمً وحره= حتى وسط نومه حلومه تناديك
يقاسي الايام حلوه ومرّه= لكنّ تذرف دمعته عند طاريك
يعشق حروف اسمك ويفيدك عمره= ياصاحب اللي لاضوى الليل بابكيك
بكيت زولك يوم فالليل قمره= وش عاد وضعي فالغداري احاكيك
غلاك عندي مايصدق بأمره= وتبي تكذبني؟ألى قلت مغليك
حبك تكّون في عيوني مقره= تستاهل أني في عيوني بساويك
أتعيش يومك بالهنا والمسره= وأنا الذي نظرات عيني تبكّيك
ملكت قلبي وأنت ماضي بهجره =وش عاد لو تاصل خفوقي واناجيك
مايطري في بالك أزوره وأمره= وأنا الذي لاشفت زولك بناديك
أشعلت ناري مابقى كود جمره =على الامل في زحمة الياس بارجيك
لو التمني زارني يوم مره= والحظ قام وقال شبيك لبيك
طلبت ودك ياربيعي وزهره= وجمعّت زين الكون كله فداويك
انا الذي هليت فالحب عبره= وانا الذي بالود دايم مجازيك
ولو طال هجرك عالي الصوت اجره =واشق ثوبي اسهر الليل اناجيك