واحد يروي موقف حصله يقول كنت منوم بالمستشفى وكان فيه واحد منوم بجواري بنفس الغرفة وما ا سمع إلا الآهات ماغير يحن ويون من الأوجاع اللي فيه أنا قلت يمكن إنه مسوي حادث قوي أو إنه محترق أو أو أو ... إلخ المهم جت الساعه 4 العصر وبدأ وقت الزياره أنا أستغربت من شي غريب مره كل من جاء يزور هالشخص يطلع من عنده ميت من الضحك أنا قلت وش السالفه ؟ وعلى هالحال كل من جاء وسلم عليه ما تسمع إلا ضحكهم من وراء الستاير أنا قلت لازم أعرف وش السالفه ... انتهى وقت الزياره واروح له وأقوله الحمد لله على السلامه عسى ماشر ومن هالكلام وأنا كل همي أعرف ليش يضحكون ؟ المهم قلت له : أنا أشوف اللي يجونك ما يرحون من عندك إلا و ضحكهم واصل آخر المستشفى ! قال لي : هههههههههه ليـش عاد أنت حاسدنا على الضحكه ؟ قلت له : لا يـاخوي مو كذا السالفه والله لو عندك مليون كان يمكن أحسدك ! بس إضحكوا عادي خذوا راحتكم بس بغيت أعرف السر يعني ؟ إذا ما عندك مانع . قال لي : طيـب ولا يهمك ... أنت مثل ما تشوفني مكسر ومربط بالشاش . قلت له : أيـوه والله ... الله يشفيك . قال لي : يا طويل العمر أنا ساكن في في بيت شعبي وله سطح هذا زينه وأنام فوق السطح ، ويوم نمت. وغصت في أعماق أعماق نومي ، حلمت اني في يوم القيامه ! وحلمت مثل ما تقول ان الناس في مكان مثل موقف الباصات وفيه باصات رايحه للجنه وباصات رايحه للنار !!! المهم الجماعه ينادون بالأسامي .. فلان بن فلانه باص النار ... فلان بن فلان باص الجنه .. وهكذا ... فلان بن فلانه .. هاه هذا أسمي .. وقلبي يـدق و يـدق .. روح باص الجنه .. اوووه الحمدلله أرتحت . ومشيـت أدور على الباص اللي مكتوب عليه إلى الجنه ... وحصلته ودخلت فيه . مشيـنا بالباص وبعد فترة جاتنا لوحه مكتوب عليها الجنه 50 كيلو**** النار 100 كيلو وهذا وحنا مع اللوحات .. والله ونتعدى الجنه ... قلت يمكن السواق يـعرف مكان لباب ثاني . شوي وشفت النار 15 كيلو ... وبعد شوي النار 10 كيلو ... وكل شوي نقرب من النار . يا رجال وش السالفه .. المشكله الناس ساكتيـن وما أحد قلقان في الباص إلا أنا . قلت ا بدخل على السواق وشفته معطيني ظهره ... هي أنت وين رايح ؟ قال لي بدون ما يلتفت : رايح النار يا حبيبي . قلت له : أنا من أهل الجنه .. وليـش توديني النار يا وجه النحس ؟! وألتفت لي ... طلع هو إبليس !!! الله يلعنك . أنا من أهل الجنه .. يا ملعون لا توديني النار .. أنا من أهل الجنه . والله العظيم إني من أهل الجنه ، تو هم منادين بآسمي، وقف يا ملعون ، وقف يا ملعون . وهذا أنا أصارخ ... وهو بأنواع الضحكات الشريره هاهاها ... هاهاها ... هاهاها ... قلت له : يا ملعون وقف !!! أبي أنزل !!! قال : والله الباص هذا مبرمج على انه ما يوقف إلا في النار ... تبي تنزل أقفز منه . وركضت على الباب وفتحته ... وهوووب ولا وعيت إلا في المستشفى ... قافز منالسطح... في الحوش !