هل يوجد مثل هذه الشاعره ....؟؟؟؟ ادخل واحكم

عابرة سبيل...شاعره عجز ويعجز وسيعجز الزمان ان ينجب مثلها , لها الكثير من القصائد المليئه بالاحساس الصادق وامتازت بالبساطه في الشعر .
.
توفيت في عام 2003 ميلادي رحمها الله
.
يقال انه لا يوجد شاعره اسمها عابرة سبيل وان شاعر يكتب بهذا الاسم وكثرت الاقاويل عن هويتها
.
لها ديوان مقروء طُبع بعد وفاتها..
.
حاولت ان اجمع قصائدها لتُحصر هُنا في القمه
.
.
قالت عن هويتها :

أنا عجـوز مطلقـة وأم ورعـان
وأيضاً مدام وبنت وآنس وعانـس
أنا بدوية وعايشه عنـد حضـران
وبنت البحر وأبوي زارع وغارس
أميةٍ ماتعـرف حـروف وألـوان
وتلميذةٍ دشـت جميـع المـدارس
ظفرة وخبلة عاقلة فـي نقصـان
شرود وأنطح لي ثمانيـن فـارس
خلوني أعيش العابرة دون عنوان
طيفٍ يمـر بلارقابـة وحـارس


قالت عن الفراق :
.

ليته درى صبيحة العيد وش صار .... ياهو جرالي من عذابي هوايل
يوم العذارى بيّحن بعض الاسرار .... وجت السوالف بين قيلٍ وقايل
هذي معايدها قبل وقت الاسحار .... وهذيك صاحبها عطاها رسايل
وهذي تماري في غلا الصاحب البار .... وتقول عايدها بكل الوسايل
وانا اتلفت فوق ويمين ويسار .... بالعيد ما حتى مشطت الجدايل


قالت ايضآ :

أهـلـي يــدرون إنــي شـاعــرة
بس مايدرون في جرح الليالـي
يمنعونـي مــن كتـابـة خـاطـرة
مادروا إني من زمان بهالمجال
آه لو يدرون انـي (( عابـرة ))
عندهم بتصير موتتنـا .. حـلال


وقالت في قصيده لها (( رساله من بدويه )) :

تعال بشـرح لـك أنـا كـل مغلـوق.....تعـال شاهـدنـي مــع ذكريـاتـي
لا لا يغرك لبس موضـة ومسحـوق.....انفض غبـار الوقـت تلقـي صفاتـي
قرب وطالع معّـن الشـوف بحـدوق....وزيف التطـور جـرده مـن حياتـي
بتشوف في وجهي من الماضي اطروق.....أخذت من بطن الصحـاري صفاتـي
طفلـة بثـوب مخيطينـه ومفـتـوق.....تنطـر جديـد الثـوب بالعيـد ياتـي
سمعت طرف اخبار عن كلمة السـوق.....وتاخذ وتسـأل هـو وجـوده ثباتـي
طفلـه سحبهـا الوقـت للهم برفـوق.....حتي انهـا صـارت مـن العاشقاتـي
وجار الزمن وعرض الحـب للعـوق.....شـرق ركايبهـا وهــم مشمـلاتـي
واتلا عهدها فيـه يركـض ورا نـوق....مسرود جيب وفـي يدينـه عصاتـي
ويصد لكن يلتفـت لـي مـن الشـوق.....عجـلان يلخصنـي بعيـنٍ تحـاتـي
وقفـى وخطواتـه يتـلـن معـلـوق.....وخلانـي ماتنقـل عظامـي عبـاتـي
ودار الزمان ولا مشي الحظ بوفـوق.....ومازلـت أخفـي بالظـلام اعبراتـي
ولا زلت أنا العب له علي كل طاروق.....حتـي يجيـب الله مـوعـد وفـاتـي


بريال عارضه :

بريال عارضته على السوق بريال
من باعني برخيص والله لأبيعـه
من يشتري رجّال قصّر بالافعـال
باع العهـود الماضيـه للخديعـه
رجّال يسوى له ثمانيـن رجّـال
كل الصفات اللي ملكها فضيعـه
له ضحكةٍ تشبه لضحكات الأطفال
ذيبٍ ونظراتـه حنونـه وديعـه
وله فزعةٍ منها المجانيـن عقّـال
وفجوج لا ضاقت عليّ الوسيعـه
ياما عدل عوجا ثقيلات وطـوال
وأنـا معاقبتـه غيـورٌ صريعـه
والله يسوى لـه ثمانيـن رجّـال
والخبل مثلي لا زعل يب يبيعـه


وقالت ايضآ

باكر يجي ويا شيب عيني من الويل .... من عقب ما غاب السنين المديّه
وش آقوله صارو عيالي رجاجيل.؟ .... وش آقوله ماني بعهده وفيّه
ان قلت له اني تعذبت بالحيل .... وان قلت له اكبر عيالي سميّه
يب يعذرني ويترك القال والقيل .... ولا يجي ويّا زماني عليّه
وان جبت حظي والمقادير تعليل .... واني ضعيف ورغبـه الله قويه
يبي يصدق كلمتـي دون تحليـل .... والا يبي ينسـف كلامي عليّه
ش قوله لـه ؟ ماينفعـن الاقاويـل .... مادمـت مانـي بعـهـده وفـيـه



وقالت ايضآ عن الفراق :

حان الفراق .. وتم توديع غاليـن
قسوة زمن وظروف ماهي رحومه
وحاولت ابدّل موقف العسر باللين
وأبيـن قدامـه جسـور ظلومـه
وأعاتبه وأنقد على دمعـة العيـن
وانا - حشا لله - مانـي ألومـه
وأقول هذا حـال كـل المحبيـن
وهذا الفراق الـي تجينـا علومـه
ومسكت نفسي كن ماصاير شيـن
أخشى على خلي يشقـق هدومـه
ثم قلت وش تنطر حبيبي لهالحين؟
!! أثر ايديني ماسكـات كمومـه


وقالت عن الهم والضيقه :

ضايقه بالحيل محتاجه اشتكـي
لولا طبع فيّ .. يمديني شكيـت
بس أدور عذر منشـان البكـي
لو يدوسون بطرف ثوبي بكيت
كل ماجيـت اتريـح وارتكـي
يزدحم في خاطري الفين بيـت
ويش بيدي افعله غير الحكـي؟
قاصره خطوات رجلي لو مشيت
أسرعي يانفس موتي واهلكـي
صرتي همي يوم بالدنيا شكيـت


إنا لله :

ليتنـي البارحـه ياغالـي ماسريـت
يم درج ٍ مقفـل مـن قديـم السنيـن
أشهد اني فتحتـه وانتحبـت وبكيـت
شفت ماهيض الجرح القديـم الدفيـن
شفت وسطه رساله وليتنـي ماقريـت
بيت شعر قديم وظرف مع صورتيـن
اشهد انـي لغيـره بالغـلا ماعطيـت
واشهد انه بغاني مير ما مـن عويـن
صحت من قلب ياويلي على اللي هويت
وقمت امسح دموعي من يسار ويميـن
لاطرالي حبيبي بصوت واطي حكيـت
!! إنا لله .... وإنـا للولـي راجعيـن


هيّا تغزل

كل ما اتصل فيك.. صبح وليل تشكي لي
من عوج الاوضاع والدنيـا ومتاعبهـا
مليت يا صاحبـي مابيـك تحكـي لـي
هالأسطوانـه أنـا مليـت مطربـهـا
حتى خيالـك بتـال الليـل ياتـي لـي
جـروح وعيـون معقـوده حواجبهـا
عيشتنـي بعالـم ماهـو علـى جيلـي
زهـرة شبابـي حـرام انـك تخربهـا
يامـا هجرتـك ولا كملّـت ترحيـلـي
حبايـب ماتعـبـر عــن حبايبـهـا
حبيبتـك مـا تحـمّـل هالبهاذيـلـي
إضحـك معاهـا ولاطفهـا ولاعبهـا
هيّـا تغـزل وغـن وزيـد تدليـلـي
البـنـت ياحبـهـا لـلـي يداعبـهـا
قلـي وش رايـك بفستانـي ومنديلـي؟
الوانهن تعجبك .. أو مانـت راغبهـا؟
وقلي وش رايك بعقدي مـع خلاخيلـي؟
وشـف قذلتـي يـوم قصينـا ذوايبهـا
وقلي وش رايـك بأطباعـي وأقاويلـي
لاحـظ عليهـا وغيّـرهـا وشطّبـهـا
خل بيننـا انقـاش وعلـوم وتعاليلـي
وآمر على البنـت وان حبيـت طالبهـا
يامدمـن الهـم كافـي دمـع بالليـلـي
بكـره تشبـع مـن الدنيـا ومصايبهـا
دنيـاك والله .. ماتسـوى التزاعيـلـي
حتـى ولاهيـب كفـو الـي يعاتبـهـا


لا تسافر :

لا تسافر وتتركنـي أجاهـد غـلاك
كل شـي يهـون إلا جهـاد الغـرام
أما تبقـى معايـا أو اسافـر معـاك
لاتخلينـي لطـوال الليالـي طـعـام
خوفي البعد لامنـه خـذاك وطـواك
مثل قصـر تـولاه الزمـن والهـدام
لا تسافر وانا اللي في رجا الله ورجاك
!! لاتسافـر وتلقانـي بقايـا حطـام


يا يمه

يمه .. يايمـه .. فديتـك لاتخلينـي
بعثرني الهم وأبغـى يديـك تجمعنـي
يمه افهمينـي تـراك ان مافهمتينـي
مافيـه شخـص بهالدنيـا بيسعمنـي
ماعدت انا طفلتك.. كبـرت شوفينـي
خليك يمي تـرى الاطمـاع تتبعنـي
لاتدللينـي .. أبـي منـك تدليـنـي
وابـي ايديـك تداعبنـي وتصفعنـي
ولا انهد حيلي أبي عطفـك يقوينـي
ياما كلامك علـى الشـدات شجعنـي
وان جيتك ابكي .. ابي منك تهدينـي
مابيك تبكين .. أبغى العقـل ينفعنـي
يامملكة عطـف ياعطـر الرياحينـي
براثـن الهـم والهوجـاس تلسعنـي
بسمتك عندي الا من ضقـت تكفينـي
وارضاك عني عن الاحزان يرفعنـي
اسمى العلاقات تربط بينـك وبينـي
ياللي احضانك ان ضاق الكون تاسعني
لك احترامي وحبي والوفـا .. فينـي
وفيك اروع الحب مايخطي ويخدعني


العيد باكر :

العيد باكر .. أسعد الله ممساك
والله ما أدري وين خد جلسته
وين أنت ياللي عيدنا في محياك
كف القدر من ضيقة الخلق دسته
من يوم ما لوحت لي كف يمناك
اليوم دمعي بالخفا ما حبسته
ومن يوم ما ذوقتني حر فرقاك
والياس زرعه في حياتي غرسته
شريت لي ثوب علشان لقياك
والثوب راحت موضته مالبسته
وشريت عطر ما زهاني بلياك
أربع سنين بعلبته ما لمسته
ودفتر قصيد كل يوم يترجاك
مافيه يوم ما سهرت ودرسته


وهذه ابيات ساخره ايضآ لها :

لي صاحب منه تبي تطلع الروح ***خبل ومن هي مولعة فيه خبله
عامين المح له مع الجد ومزوح ***واقول ياعنتر تناديك عبله
طال المدى ثم قلت انا اغليك يالوح **** مجروحة جرح مخاطره عجله
دنق وقال انا من العام مجروح ***واشر لجرح مبطي وسط رجله


يا دنياي :

جيت بكتب عن شقا عمري قصيده
مير عيا القـول لا ياقـف معـي
شاف همـي والمعانـاه الشديـده
اكبر من القول وحـروف النعـي
هاك يادنيـاي عمـري ماريـده
اضربيني واقسميني واجمعي
اي نعم ماني بها الدنيـا سعيـده
من نهار ولادتي وهمـي معـي
عشت محزونه وملتاعه وشريـده
وياكبر شـيٍ تخبيـه اضلعـي
مابي بين الناس تبكي وحيـده
وان هجع طرف البشر ماتهجعـي
اما موته حـق او ايـدي بايـده
هيه يارحمه الهـي .. اسرعـي


حيرة :

لا..قال ردي لي ولا.. قال روحي
لا .. هو مريحني ولاهوب مرتاح
يغيـب ويعـود يفتـق جروحـي
واذا استجد الجرح لوح لـى وراح
واضحك واجامل وادعي بالفروحي
وبداخلي نار.. وتجاريح وصيـاح
واحاول اخفي جروحـي بروحـي
واخيط جرح وتنفتق عدة اجـراح


وآخر ما قالت من الشعر وهي على فراش الموت :
تــرى الـذبـايـح و أهلهـا مـا تـسليني …. أنـا أدري إن الـمرض لا يـمـكـن عـلاجـه
أدري تـبـي راحـتـي لا يـا بـعد عـيني …. حـرام مـا قـصـرت يـديـك فـي حـاجــــه
أخـذ وصــــاتـي وأمـانــه لا تـبـكـيـنـي …. لــو كـان لـك خـاطـرٍ مـا ودي إزعـاجــه
أبـيك فـي يـديك تشهـدني وتسقيني …. أمـانـتـك لا يـجـي جـسمـي بـثـلاجــه
لـف الكفن في يـديـك وضـف رجـلينـي …. ما غيـرك أحدٍ كشف حسناه واحراجـه
أبــيـك بـالـخيــر تــذكــرني وتـطـريـنـي …. يـجـيرني خـالـقـي مـن نـــار وهـاجـه
سامح على اللي جرى ما بينك وبيني …. أيـــام نـمـشـي عـدل وأيـام مـنعاجـه
همـي عيـالي وأنـا اللي فيْ ..كافيني …. عـلمـهم الـديـن تـفسـيره ومـنهـاجه


لكم الود وعسى ان تنال على استحسانكم
والخطأ وارد والعذر مقدمآ ان بدا خطأ

الله يرحمها

وتشكر ياغريب الدار


ويعطيك العافيه

غريب

الله يعطيك العافية


رحمها الله وأبدعة في شعرها المييز


كن بخير

الله يرحمها

وتشكرعلى الطرح الاكثر من رائع يا غريب الدار


تقبل مروري





أحمد الوصلي

الله يرحمها ويسكنها الجنه


شاعره من الوزن الثقيل .

تحياتي لك

يعطيكم العافيه على المروووووووووووووور

الله يرحمها

شاعرة مرهفة الحس

يسلموووووو اخوي

ثاااانكس