ياساري المزن

ياساري المزن ماتسري على بلادي

وتهل وبلك على صادي مضاميها


جدد لها ياثقيل النو ميعادي

مع أول الوسم تكفى لا تخليها


سير عليها ولا تترك بها وادي

إلا وسيله يفيض في مفاليها


خل الظما ينتزح عن خدها غادي

والصيب العذب ينعشها ويحييها


يامزن أنا ديرتي هي مهجة فوادي

أحيا معاها وأموت بموت أراضيها


هي النسم لي وهي شربي وهي زادي

روحي هواها وجسمي من صحاريها


لغبت عنها أعيش بغم وسهادي

وإن جيتها حزت أنا الدنيا ومافيها


أحبها حب لا هادي ولا عادي

أفدي ثراها بروحي ماتجازيها


ديرة هل السيف والتوحيد الأسيادي

أرض الجزيره يا عل الغيث يسقيها


مني لأهلها سلامي حاضر وبادي

والحب والله ترى من حب أهاليها


شعر : خالد بن سعود الكبير