يا ضحكت الورع ...حمد السعيد

يا ضحكت الورع مدري وين شايفها
ان كان ماني متوهم ضحكت فلانه

قمازته وشفته تشبه شفايفها
وعيونه عيونها يضحك ونعسانه

والله يا ضحكته عجزت اطوفها
اللي شغلني معه من جملة اخوانه

وقفت والنفس مابدت حسايفها
ضيعت وقتي غصب كله على شانه

انشده والبشر تتبع ولايفها
يلعب طرب بالملاهي بين ورعانه

صديت والعين ماتنسى وصايفها
هذيك نفسي عليها حيل شفقانه

وا نفس ياللي تحلفني واحلفها
حاولت اشكك وهي ماهيب غلطانه

تقول هل الورع والله من خلايفها
واقول ربي يخلق اشباه سبحانه

هذيك راحة وانا ماني بعايفها
حكم المقدر وكلن راح في شانه

خبريبها يوم جاها من طويفها
الي خذاها ويتبع سلم جدانه

ماشافته ولاهو ماهو بعارفها
ماشاورها ابد ما كنها انسانه

راحت وانا بالشقى كني مناصفها
يا مل قلبن شكى همه وحرمانه

لليوم قلبي يرددلي سوالفها
هذيك نفسي عليها حيل شفقانه