اللي عنده قصيده الشاعر علي الريض يجيبها هنا

علي الريض : أه من طيش القصيد



أه من طيش القصيد ومن شقاه ومن هبالـه
............... واه من شيٍ يحد النفـس وازعلهـا عليّـه
شاعرٍ لا ضاق صدره من زعل طوح عقالـه
...............وجر دلوه من قليب الشعر واخرجها رويّه
له ثلاث ايـام مـا ذاق المنـام ولا هنالـه
...............كل ماغمض جفن عينه تبعد عـن خويّـه
قلت في نفسي ومن ضيم الزمان وسؤالـه
...............ليه لامن ضقت ما اجر اللحون السامريّـه
لا ذكرت الشايب اللي كنت انا اصغر عياله
...............كنت احس بقيمتي عنده واحس ابمقدريّـه
كنت انام بوسط بشته واتفيـا فـي ظلالـه
...............كان كله لي لحاف وعن سموم الفيـض فيّـه
كنت اعرف انه يعاني بس يكتمهـا بحالـه
...............اعرف رجلٍ صبور وضيقتـه دايـم خفيّـه
اذكر انه يوم ناداني وهـو جالـس لحالـه
...............قال ياذخري تعال اعطيك من عندي وصيّه
واذكر انه صد عني بس مدري وش طرالـه
...............كان مـاوده يبيـن لوعـت الايـام ليّـه
اذكر انه قالـ لاتاخـذ الدنيـا جهالـه
...............التجارب فالحياه وكـل نفـس إلهـا منيّـه
والابن آدم لا تعافا والزمن طاف وصفالـه
...............لا يحسب ان الليالـي كلهـا دايـم هنيّـه
ياوليدي والجمل لامن برك للحمـل شالـه
...............والرغى عقب الهدير يضعف النفس القويّـه
ياوليدي وان فعل بك طيب لا تنسى الجماله
...............كان ماتقدر ترد الطيـب لا تجـزاه سيّـه
ولا تمن الليا عطيت ولا تدور لـك جزالـه
...............ولا تدور من ضعيف النفس جود ولا عطيّه
ولا تصير المنخل اللي تجتمع فيـه الحثالـه
...............ولاتصير الخايب اللي خوتـه دايـم رديّـه
عقبها من يوم سافر كنت افكر وش جراله
...............كنت احسبه راح طرقي واثرها روحه مديّه
يوم روح كل عرقٍ فـي معاليقـي بكالـه
...............كنت امش الدمع من عيني واقول الله وليّـه
كنت اقول انه يعود بس خانت بـه ليالـه
...............اه من قل العزى للحين افكـر فـي مجيّـه
والله انه في جنوب القلب مدري في شمالـه
...............لين اموت ونار بعده في حنايا القلب حيّـه
اتخيل صورتـه فالحلـم واناجـي خيالـه
...............واتمنـى جيتـه لابـارو الاقـراب فـيّـه
ليت ابويا حي يرزق لو انـا ميـت بدالـه
...............والله اني ما اتحسف لو غدت عمري ضحيّه
ياعسى مزنٍ يلوح البرق في مقـدم خيالـه
...............يسبقه ريح المطر وتبشـر الـدار السنيّـه
تدفعه صلف الهبوب وصاخب الرعد ايحداله
...............ويتسابق للثـرى همـال غيثـه وابرديّـه
ياعساه لقبر ابوي يصب سيله فـوق جالـه
...............لين يصبح من بعدها القبـر كنـه مزهريّـه
وياعسى الله يرحمه ويسكنـه دار العدالـه
...............وياعساه بجنه الفردوس يسكـن مـع نبيّـه
قلتها وانا اتجمـل بالصبـر واقـول دالـه
...............لو ان حزني ماتكفيـه الحـروف الابجديّـه
واه من طيش القصيد ومن شقاه ومن هبالـه
...............يكشف اسرار القلوب وينبش جروحٍ نديّه