سلطان الخير

كريـم يانـوٍ هبـوبـه تـقـوده

لي مدة ٍ وأنـا عيونـي تراعيـه

أقبل من الغربي تـرازم رعـوده

سيله حقـاق ٍ والبشايـر تباريـه

إليا وطـا حـزم البـلاد ونفـوده

بعد المحل ماناش من عرق يحييه

أيـام وسمـه ماتجيـك معـدوده

ثابت على طول السنه من مناشيه

هتـان ودّان ذعـاذيـع نــوده

تبعد هموم القلب والجرح تبريـه

إليا سمك وبلـه وخيّـم ركـوده

تفرح به البيدا وتروي ضواميـه

فوق البسيطـه ماتحـدد حـدوده

مافيه وادي غير تجري مجاريـه

والعشب بأنواعـه تمايـل وروده

طلعه سوا من مدلهـم ٍ يساقيـه

هذي هماليلـه وهـذي شهـوده

كلٍ يرحـب بـه وكـل ٍ يحييـه

هذاك سلطان السعد مـن جـدوده

غيث ٍ على غيث ٍ عسى الله يعافيه

لا راح قلنـا الله علينـا يـعـوده

من كثر حبه ود شعبـه يخاويـه

وإليا رجع تباشروا فـي وجـوده

شيخ ٍ تحن أرض البلاد لمواطيـه

حنا تحـت رايـه وحنـا جنـوده

وأعمارنا في ساعة الحرب تفديـه

القايد اللي منبـع الجـود جـوده

صار الكرم صرحاً للأمجاد بانيـه

خلو كرم حاتم وماضـي عهـوده

سلطان يعطي شي حاتم مايعطيـه

خيره على العالم عسى الله يزوده

لو جيت أبذكر ماتعـدد حسانيـه

وفاه وصلت كـل دولـه وفـوده

في مد كفّه مايبـا أحـدٍ يكافيـه

وإليا قدح من نار فكـره زنـوده

رايه سديـد وكـل تايـه يقدّيـه

وإليا بطش ضاعت روابع حسوده

من سطوته خصمه يضيّع هقاويه

هذاج تيمـا اللـي يصـدر وروده

ياحي أبو خالد ويا حـي طاريـه

كنت أتمنى وقفتـي فـي وجـوده

واليوم موجود ٍ هنا بيـن أياديـه

كتبها/

شااعر الوطن

تركي بن عطاالله الميزاني

يعطيك العافيه اخي همام
"الله يردك سالماً معافا ياسيدي سلطان"