مدونتي الشعرية

يكون الله بعون اللي صبر مثلي على الشدات=يكون الله بعونه واحدٍ دنياه ضايمته
أنا عبدٍ غريب وداخلي كومٍ من الضيقات=وعبراتٍ لها مدة بوسط الصدر رايمته
زمان أقشر وحظ أغبر ودنيا كلها لوعات=وحظي مانفع راعيه يوم الناس ظالمته
أنا من ظلمني طفلةٍ فيها الخفوق أقتات=صغيرة عارفه قلبي وقدر الحب عالمته
صغيرة جات له صدفة تدوّر عن وطنها ذات=حضنها مادرى ان اللي حضنها هي نادمته
تنحت ماحصل شيٍ يضيقها ولازلات=تنحت عن خفوقٍ حبها من جات هايمته
عطاها من صميمه كل ماتطلب وقالت هات=عطاها ثم عطاها ثم عطاها بس لايمته
تنحت عن خفوقٍ من غلاها في غلاها مات=يموت ألفين مرة قدمها ماهي براحمته
قسى وقتي وقساها وعلمها على الصدات=سهر جفني يناجيها على الدمعات علمته
حفظها قلبي الطاهر وكرمها على الزينات=حفظها حفظه لنبضه وهي ماهي مكرمته
ألاياوجد حالي وجد شايب يذرف الدمعات=على حرٍ من عياله منايا الموت هاجمته
ألاياوجد حالي مابقى بالحال كود شتات=على اللي يمها قلبي بدون اثمان سلمته
ألايارب وش باقي من أحزاني بعد ماجات= ألا يالله أنا دخيلك ودرب الحب حرمته