كسر الخواطر( اخوكم نايف معلي العزيزي)

السلام عليكم ورحمة الله

ابيات متواضعه عسى ترتقي لذائقتكم




توكل بالولي خل الاوادم ما وراها فود .......... لو انه قال ادبرها في وجهي ما يدبرها

اعرف اللي مجرد هرج واللي يبذل المجهود....... واعرف اللي ماقدرها واعرف اللي يقدرها

واعرف اللي ليامنه تعذر قلت له معذور........ واعرف اللي تعذر ما تعذر ما يعذرها

لكن ارضى على الواقع ولا تزعل من المنقود......ونصيحه لا تحاول كل هرجه لك تفسرها

ترى طرد الكلام ان كان ما نقصك مابه زود........ يجرك في متاهاتن ماتقدر تصل لاخرها

وكثر المال في مايغني ضعيف النفس والمقرود..... وقل المال في عيال الشجاعه ما يفقرها

والا ياصاحبن دونه جبالن شامخه وحفود........ اقدم لك سلامي من مشاعر منت خابرها

ما اقول ان الخطا مسموح اقول ان البراء مردود.... ومعاريف الرجال لبعضها تدمح معاثرها

تميل اغصان وتميل الطيور اللي عليها ترود..... ومع الايام تابس والزمان الصلف يكسرها

لكن الطير ما يبلش يحصل غير عوده عود........ تسندها الهبايب فوق الاغصان وتحدرها

وانا لامن كسرت بخاطر الصاحب ماهو مقصود...... لو ان بعض الرفاقه ودي اكسر خواطرها