من فن المجارير القديمة

يا عيسلٍ في معالـي قنّـةٍ وازريـت أعدّيـه ==== حداني النحل من دونه وانـا جيعـان ضامـي
جوني بشربة قراح من المطر مـا زل حاديـه ==== كبيت شرب القراح و قلت انا جيعـان ضامـي
وجوني بسكر نبات و كل مجموع الـدواء فيـه ==== كبيت سكر نبات و قلت انـا جيعـان ضامـي
وجوني بدر البكار اللي عليل الجـوف يبريـه ==== كبيت در البكار و قلـت انـا جيعـان ضامـي
وجوني بتمر الكبيس اللي على الساقي مجانيه ==== كبيت تمر الكبيس و قلت انا جيعـان ضامـي
وجوني بمال الشريف اللي ميّة فقـران يغنيـه ==== كبيت مال الشريف و قلت انا جيعـان ضامـي
قالوا سببك المرض قلت المرض ما بي شكاويه ==== اللي سببه المرض ما يمتني زيـن الطعامـي
قالوا سببك الكبر قلت الكبـر مابـي تحاليـه ==== حيث ان شوفي حديـد ولا تجودنـي عظامـي
قالوا سببك الهوى قلت الهوى قمنـا حراويـه ==== عطوني الجادل اللي حسبته عشريـن عامـي