يا راكبٍ من عندنا جيب شاصي=جيبٍ جديداٍ بالحمل ما بعد رص
اللي مقامه فزةٍ برتقاصي=شبح ما هو صالون وألا مقفص
ما ركبوا له خلف بديه قلاصي=ولاشيل بالونشات يشحن ويقلص
ينصاك ياللي في بعيد المناصي=شبل الحرار اللي على الطيب تحرص
ينصاك يا تركي ويلفيك ناصي=ينصاك ويخص من المجتمع خص
ما فوقه الأ حاملين الرصاصي=بيمانهم سردٍ تقص الهدف قص
اللي لهم بالصيد فن إقتناصي=ولهم بمرتع شرد الصيد مقنص
وأيضاً لهم ولعه ودايم حراصي=على لحوق الذود في مهمهٍ حص
في خايعٍ قد جاء لسيله تناصي=حتى طغى عشبه على القشع وإرتص
نبي لنا عشرة بيوتٍ قواصي=متقاصيات القاف والوزن والنص
هات الثمين وخل عنك الرخاصي=غال الثمن لن بيع برخيص يرخص
ويالله عساك إطيع ما تكون عاصي=حق العصايه مطرقٍ تو ما قص
ليه إيتعمد فالكلام إينتقاصي=ويقول من خرجك بالشعر وإخلص
وأنا الصعاب المبهمات إختصاصي=خريج من هو لصعب القاف مختص
قول الرياجيل الثقات البخاصي=إما تجيب العشر الأبيات والا إص

يا شرد الأبيات بيض النواصي=اللي علي في بنيهن شصهٍ شص
اللي نقاهن نقي تمر الخلاصي=لم الجزيل ومن هزلهن تخلص
واق الطويل وفالمحيطات غاصي=ومن منبعن ينبع بهن فصهن فص
عن الشوايب محترصها إحتراصي=يطرق مقادم قافهن كل مالص
يوم أرزمن وأبهج بدر العواصي=لين الديود المبهله مصهن مص
أسرج بقلبي دون داني وقاصي=ودفعت قسمي مثل من يدفع الحص
لو إن أنا عارف مداي وخلاصي=ولاني بحب الخاتم اللي بلا فص
طبعي حريص أقص درب الحراصي=مع مهمهن فيه السراب يتبالص
والشعر من مادل مبداه حاصي=يتوه في ممشاه من لا تحصص
وأنته وتركي قبل يبدأ النقاصي=يا ويش شيٍ كل ما زاد ينقص
الله يجنبنا دروب المعاصي=ويدلنا للخير والعارف أبخص

أخوي العباقر
بارك الله فيك وفي نقلك الطيب المميز
صح لسانك وسلمت يمينك
قصائد في غاية الجمال والأبداع من شعراء لهم مكانتهم في قبيلة بني عزيز بل قبيلة مطير

وفي الحقيله ان ابن علي وتركي وابو نايف كل منهم من يقول ان الأبداع والجزاله عندي

صحت السنتهم اجمعين وسلمت لنا اقلامهم الرائعه

ودمت انت في هذا الصرح مثل ما دامت كلماتهم الطيبه في الشعر خالده يتغنى بها المعجبون


واكرر شكري وتقديري لك اخوي الغالي


اخوك
واصل عزيزي