اللي عنده قصيده الشاعر علي الريض يجيبها هنا

قصيدة : حياة جديدة للشاعر : علي الريض العزيزي

اتمنى أن تحوز على رضاكم وإستحسانكم


الحياه الجديدة

الليل روح وانهزع بي جريده ............ والصبح مابيّن على روس الأطلال

وانا شريط الذاكره قمت اعيده ............ واشوف وش لون انقلب حال عن حال

ذكرت من كان الترف وصف بيده ............ واليوم صارت بالملايين تختال

كانت فقيره في الحياة الزهيده ............ محرومة(ن) من لعب واحلام الأطفال

كانت فرح قلبي وهمه وعيده ............ لاشفتها شخصت بشماغ وعقال

ولاشفت نفسي تقول .. شـ هالوليده ............ واقول ياربي متى اصير رجال

كانت تقول اكتب لعيني قصيده ............ واقول بكبر واكتب الشعر واختال

واكتب لعينك كل يوم(ن) جديده ............ قصيدة(ن) تحفظ على مر الأجيال

كانت فريدة حسن فعلا فريده ............ يرقص لها قلبي من الجال للجال

كانت تقول أمي تراها شديده ............ وابوي مات ولاذخر عقبه عيال

مير اعتبرني من خواتك وحيده ............ أبيك تشري لي خواتم وسلسال

وانا فقير ٍ مامعه في رصيده ........... من كثر فقره .. صدق مايملك ريال

كنت اعتبر يوم ان الليالي عنيده ............ واقول باكر ينقلب حال واحوال

وفعلا تعيش اليوم عيشه سعيده ............ تزوجت واحد من رجال الأعمال

هو عندها خاتم .. وهي مثل سيده ............ تملك لها فله وسايق وجوال

من بعد ماغابت سنين ٍ عديده ............ قابلتها وانا على الفقر لازال

سألتها .. وش الحياة الجديده ............ قالت نسيت اسمك ولا انته على البال

ورجعت اطالع صورتي في الجريده ............ مافادني شعري بعد صرت رجال


وسلامتكم

هذي القصيده للشاعر الكبير علي الريض