العين عن حلو الكرى

]

العين عن حلـو الكـرى موقهـا تـاب

ماتـذوق حلـو النـوم مـع ذايقيـنـه

أسباب لأنه مـاش شـي ٍ بـلا أسباب

هكـا الغـزال اللـي ذبحنـي بزيـنـه

مـر يتخطـا .. ويتلفلـف بـالاسـلاب

وطيّـر عـن القلـب المشقـا يقيـنـه

من نظرته وقع علـى القلـب مضـراب

اشـد وقـع مـن الرمـاح السنيـنـه

يسرق نظر عينه حذر .. مدري عجـاب

وانـا منـه قلـبـي تقـطـع وتيـنـه

عـرّض ومـن تعريضتـه خافقـي ذاب

وقمـت اتبعـه مغيـر عينـي بعيـنـه

واقفى عجل من نظرتـي فيـه مرتـاب

ويحـط ضـول النـاس بينـي وبيـنـه

وصديت عنه وخاطـري منـه ماطـاب

كني ماني يمـه .. وانـا اقـول وينـه

اخاف يفطن لي .. وننشـب بالانشـاب

السـوق زحـمـه .. ولاوادم ذهيـنـه

واخذت عنه شوي مقفي .. والاعصـاب

متـوتـره .. مافـكـرت بتهـويـنـه

ولديـت .. ولينـه يسعـر يالاطـيـاب

عنـد الهنـود اللـي لغتهـم رطيـنـه

وارسلت يمـه نظـرة احبـاب لحبـاب

النظـره اللـي ماتركـت لـي غبينـه

وأقبـل يبـا يحطنـي عنـه مجـنـاب

وشكيت في ممشـاه .. علـى هوينـه

ناظرت فيه .. وضحـك النـاب للنـاب

ومن ضحكتـه حلـت علـي السكينـه

وموه على اهل السوق .. واشر بلاهداب

اشـارة ٍ تبـغـى قـلـوب ٍ فطيـنـه

منها عرفت انه يبـا يعـود لـو غـاب

وان الامـر ماعـاد هـو فـي يدينـه

وعقب غلاق اسبوع .. مر ومعه جـاب

صغـيّـر ٍ متـجـود ٍ فــي يميـنـه

صغيّـر ٍ بالـزيـن للعـقـل نـهـاب

يقـول اخـوي .. ومقصـده فاهمينـه

قصده .. يقول انكـان عنـدك أستيعـاب

علـى مـن هـذا ؟؟ ملامـح وعينـه

واخذت انـا ويـاه .. مـزح وتعجـاب

عقله رزيـن .. وكـل كلمـه رزينـه

فـي موقـع ٍ عنـه المخاليـق غيـاب

الا ملائـكـة العـمـل حاضـريـنـه

بينـي وبينـه ماوقـف غـيـر الاداب

آداب سـلــم ٍ كـلـنـا وارثـيـنـه

منه حتـرام شعـور عربيـن الانسـاب

ومنه حترام الرجـل نفسـه .. ودينـه

وبغى الوكاد .. وقلت هايـم ومنصـاب

حبـك .. ذبحنـي لعنـبـو والديـنـه

قال استميحك عـذر .. واقـول لعـاب

وش هالغـرام اللـي غدابـك بحيـنـه

وحلفت له .. واقسمت في رب الاربـاب

منقـذ مـن الطوفـان راع السفيـنـه

انـي معـك صـادق ولانـي بـكـذاب

والـكـاذب الله لايـطـول سنـيـنـه

قال انت صادق .. مير سابقـك خطـاب

واهلـي فـي تـال الشهـر موعدينـه

كـم لـه وهـو مغيـر ذهـاب إيـاب

لاهـم براضيـنـه .. ولا رافضيـنـه

وان كانهـا تمـت علـى يديـن كتـاب

وتـم القـران .. وروحــو كاتبيـنـه

انا تراي ابـي اعتبـرك مـن الاقـراب

وعلـى النقـا .. تبقـا صلتنـا متينـه

وودع وصارت كلمتـه تقـل مشهـاب

اركت على كبـدي (عراقـي مزينـه )

وبقيت في وضع ٍ تحيـر ابـه الاطبـاب
ايسـت منـه وحالـة اليـاس شيـنـه

واخذت وقـت احسـب ايامـه حسـاب

وقلبـي علـى شوفـه تزايـد حنينـه

احيان .. اقول انشد عنه بعض الاصحاب

ويجيـك بالعلـم الموكـد ( جهيـنـه)

واحيان اقول اصبر على جـور الاتعـاب

ورزق الفتى وأجله كتـب فـي جبينـه

وسكت .. ماودي عليـه افتـح ابـواب

للهرج مـن نـاس ٍ ماهـم راحميـنـه

وصبرت .. مير الصبـر طـول ولاثـاب

ومـن طـال صبـره يالله انـك تعينـه

ويوم ان راسي من طويل الصبر شـاب

قـررت عنـه انشـد حـدا مجاورينـه

ونشدت عنـه وقـال راحوبـه أجنـاب

ومن قريته شـدّ .. وسكـن بالمدينـه

قلت ايه .. مادام اهلـه عندنـا يجـاب

امـا بعيـد الفـطـر .. والا حتيـنـه

قال اهله معه رحلـو .. قلـت ياشـاب

يعـنـي لازايـركـم .. ولازايريـنـه

قال ايه .. مير انسـه والايـام هـراب

تطـول .. وتنسـي ضنيـن ٍ ضنيـنـه

قبلي .. وقبلك خلـت اصحابنـا حـزاب

وكم فرقـت بيـن الخديـن .. وخدينـه

ماعاد في شوفـه طلايـب .. وطـلاب

تـرى مـاعـاد الا يــدرج جنيـنـه

وش تطلبه .. وحبالـه بكـف قضـاب

احذر .. لاينصـب لـك زمانـك كمينـه

قلـت الرجـال مفتلـة روس الاشنـاب

لقسـى الظـروف حسابهـم حاسبينـه

وقفيت من عنده على الغلـب .. غـلاب

اكن غيـض القلـب .. واجحـد ونينـه

واعلنت ياسي .. وانطوت صفحة كتـاب

مــن البـدايـه للنهـايـه حزيـنـه

واقــول يالله لاتـبـارك بالاسـبـاب

اللـي رمتنـي بيـن حبـه .. وبيـنـه




الشاعر / لافي حمود الغيداني