مدونتي الشعرية

ياراكب اللي مايشق غباره=بين المواتر ميزته وحداني
مصمم لعوج الدروب أختاره=ياقو تفكيرك ياهاليباني
قام يتفنن يوم صاغ أفكاره=ويصمم الهيكل على الميزاني
والواجهة ومرايته وأنواره=والخط يازينه على البيباني
والمرتبة والقير ويا الطاره=والوقفة اللي كنها سرحاني
قوي باس وقوته جباره=ماهمته حرة ولاكثباني
يصمد كما يصمد سبوق الغاره=لامن تحزم وأنتصى العدواني
وفي هدته حرٍ تقفى حباره=ماروحت لو تكفخ الجنحاني
وفي فزته فزة كريم لجاره=لارحب وحياه بالديواني
وفي زينته مازينه بستاره=بين المواتر هيبة السلطاني
ماألومهم لو زودوا بأسعاره=أنا أشهد أنه غالي الأثماني
ماصمموه لدوجةٍبالحاره=ولاصمموه لحملة الورعاني
مصممينه للعضى وقفاره=يرقى على راس الجبل شيهاني
يازين مع حزم صفا مشواره=تقول ذيبٍ هاجد العرباني
مطوعٍ عوج الدروب بزاره=ياصل دروبٍ ماوصلها ثاني
هو منوة اللي لا أبتدى مشواره=تله ورى ذودٍ تهيض أشجاني
تله وحط بخشمه المطاره=يكفيه ربي نظرة الأعياني
أنا أشهد أنه مابعده سياره=أخذ الكلام وخل قول فلاني